გაზაფხული და ჰიპოვიტამინოზი

2022-04-04

გაზაფხულის დაწყებასთან ერთად ბავშვებში ხშირად თავს იჩენს ჰიპოვიტამინოზი. ასეთ დროს ორგანიზმში აღინიშნება 1 ან რამდენიმე ვიტამინის ნაკლებობა. ჰიპოვიტამინოზის უფრო მძიმე მდგომარეობა ავიტამინოზია, როცა ორგანიზმში ვიტამინების რაოდენობა იმდენად მკვეთრადაა შემცირებული, რომ ამის გამო სხვადასხვა დაავადება ვითარდება. იგი უმეტესწილად გამოწვეულია კუჭ-ნაწლავის ტრაქტის მძიმე დაავადებებით ან არაჯანსაღი კვებით.

ძირითადად ჰიპოვიტამინოზი გარდატეხის ასაკამდე ბავშვებშია გავრცელებული. თუმცა გაზაფხულზე თითქმის ყველას ორგანიზმში შეიმჩნევა ვიტამინების ნაკლებობა, რადგან ამ პერიოდში ჯერ არ არის შემოსული ახალი ხილ-ბოსტნეული.

  1. ორგანიზმში ვიტამინების ნაკლებობას ძირითადად იწვევს ისეთი კვების რაციონი, რომელიც არასაკმარისი რაოდენობით შეიცავს ვიტამინებს. შესაძლოა საკვები პროდუქტი იყოს არასწორად დამუშავებული და ამის გამო უჭირდეს კუჭ-ნაწლავს მისი ათვისება. ხშირად საკვები პროდუქტები არასასურველი სასუქებითა და ემულგატორებით არის გამდიდრებული, ასევე დარღვეულია მათი შენახვის პირობები (მაგალითად, ხორცი რამდენჯერმეა გაყინული და გამლღვალი). ესეც ამცირებს მასში ვიტამინების რაოდენობას.
  2. გარდა ამისა, ვიტამინების ნაკლებობის მიზეზი შეიძლება იყოს ორგანიზმში არსებული პათოლოგიები, რის გამოც კუჭ-ნაწლავის ტრაქტი არ იწოვს ვიტამინების საჭირო რაოდენობას. ასეთ დროს უნდა გავითვალისწინოთ ორგანიზმში ფერმენტული და კუჭ-ნაწლავის ტრაქტის მდგომარეობა – თუ კუჭ-ნაწლავის ფუნქციონირება დარღვეულია, ეს დიზბაქტერიოზია.

☑ არსებობს გარკვეული სიმპტომები, რომელთა მეშვეობითაც თავად შეგვიძლია განვსაზღვროთ ვიტამინების კონკრეტული ჯგუფის ნაკლებობა. მაგალითად:

A ვიტამინის ნაკლებობის დროს მხედველობა უარესდება, კანი იქერცლება, თმა და ფრჩხილები კი მსხვრევადი ხდება;

B ჯგუფის ვიტამინების ნაკლებობისას ცენტრალური და პერიფერიული ნერვული სისტემის დარღვევები იჩენს თავს;

C ვიტამინის ნაკლებობაზე მიუთითებს გათხელებული კაპილარები, სისხლჩაქცევების წარმოქმნისადმი მიდრეკილება, დაბალი ჰემოგლობინი;

D ვიტამინისა და კალციუმის ნაკლებობაზე ბავშვებში მიუთითებს რაქიტის გამოვლინება. ასეთ დროს აუცილებელია ბავშვი ვასეირნოთ მზეზე, რადგან მზეზე ხდება D ვიტამინის სინთეზი კანში და ამის შედეგად ძლიერდება კალციუმის შეთვისება. კალციუმის ნაკლებობის მაჩვენებელი შეიძლება იყოს ხშირი ოფლიანობაც.

გადაჭრის გზები:

  • იკვებეთ მრავალფეროვანი და ბალანსირებული რაციონით მიირთვით მეტი ახალი ხილი და ბოსტნეული – მთელი წლის განმავლობაში:
  • შეეცადეთ თავი აარიდოთ სწრაფი კვების ობიექტებს, ნუ მიეძალებით ტკბილეულს, რაფინირებულ პროდუქტებს, ალკოჰოლს, მოწევას;
  • იზრუნეთ პროდუქტების სწორად შენახვაზე;
  • თავი აარიდეთ საკვების ხანგრძლივ თერმულ დამუშავებას.

                                                                                                                                  ნონა ფაღავა - პედიატრი / ოჯახის ექიმი